Flori conte di Midone di Biou
Gn-a d’ pus di 800 ans di-d-ci, li mârquis d’Nameur ènn.aveûve s’ sô d’aprinde qui sès sègneûrs qui vikin.nes dins leûs tchèstias au d’zeû dè l’ valéye di Moûse, scrotin.nes lès martchands èt lès pèlèrins qui passin.nes dé leû prôpièté, striyin.nes lès abîyes, coboutin.nes lès p’titès djins èt maltraîtin.nes lès comères.
I dècida d’è fini èt dona en omadje li sègneûrîye di Montaigle au comte di Berlaymont qu’aveûve tote si confiyince.
Li comte èsteûve tcherdjî di s’ rinde maîsse di sès djins, di ramwinrner l’orde èt l’ paîs inte lès barons. Sins taurdji, l’ome s’a mètu à l’bèsogne, maîs come il èsteûve fwârt vayant, on n’lî v’leûve nin qui do bin èt on djoû d’ tchèsse, on l’a r’trouvè touwè au cwin d’on bwès. Si fi èt si p’tit fi ont continuwé s’ bouye. Gn-aveûve co saquants sègneûrs qui l’ vèyin.nes èvi èt is avin.nes à leû tièsse li sègneûr di Biou.
Insi lès sègneûrs di Biou èt lès comtes di Montaigle ont div’nus in.nemis. Li sègneûr di Biou èsteûve on vî ome fwârt vayant, mais ossi boûria èt cagnârd.
I saveûve qui s’t-in.ne aleûve si distinde avou li pace qu’i n’aveûve qu’one bauchèle ; adon qui l’ comte aveûve on fi lomé Gilles, on chèvalier qui fieûve peû à tot l’monde.
On bia djoû, Gilles tchèsseûve avou on soçon èt aporçût à l’orêre do bwès one djon.ne comère diloûjîye. Il a apris qui c’èsteûve Midone, li fèye do vî sègneûr di Biou. Saquants djoûs pus taurd, dins on pitit cléris’, il a vèyu à gngnos divant one posture di l’Aviérje, Midone qui d’jeûve sès pâtêrs. I lî dèclara s’ t-amour tot z-apirdant qui s’ t-agrès lî plaîjeûve bin. Adon, is s’ sont r’trovés tos lès djoûs dins l’ bwès, lon èri dès trop d’ linwe.
L’iviêr a mètu one fin à leûs radjoûs è catchète èt il a bin falu anoncî aus parints qu’is s’ vèyin.nes voltî. Li père da Gilles acôrda tot d’ swîte si consintemint tot vèyant insi li fin à one trop vîye dispite.
Midone anonça à s’ papa s’ t-idéye di fé l’ grand nuk avou Gilles de Berlaymont, maîs l’ vî sègneûr di Biou intra dins one nwâre furîye èt lî dit qu’i l’ vièreûve mia mwate qui mariyéye avou on Berlaymont èt l’ tapa à l’ uch. Li pôve Midone n’aveûve pus qu’à couru s’ mète au r’cwè au tchèstia d’ Montaigle où c’ qu’elle a stî fwârt bib r’çûte. Gilles lî a propôsé dè l’ marier li lend’mwin dins l’tchapèle do Tchèstia.
Li lend’mwin, l’abé dès Berlaymont a stî veûy li sègneûr di Biou po lî anoncî l’mariadje èt lî propôser li paîs inte lès deûs familes.
Po tote rèsponse, li sègneûr di Biou a promètu à l’abé d’ aler bouter l’ feu au tchèstia di s’t-in.nemi.
Lès deûs tropes si sont rèscontréyes au pîd di Montaigle. Pa one finièsse do tchèstia, Midone riwaîteûve li bataye tot prîyant l’Aviérje. Vèyant s’ père ataquer Gilles, elle a couru viè s’ papa èt l’ supliyî d’arêter. Tot vèyant s’ fèye, li radje do comte ridobla èt i l’a pèrcé pâr. Adon, il a tchôké si tch’vau qu’a pèstèlè l’ cwârps di s’ fèye. Di radje èt d’ sofrance, Gilles a touwè d’on côp d’èpéye li tch’vau di s’ bia-père èt d’on ôte côp, il a foutu djus li tièsse di s’ t-in.nemi.
Ni savant si rapaujî, Gilles è-st-èvôye po “l’Terre Sainte” èt i lî a moru.
Acâblés di sofrance èt di disseûlance, sès vîs parints ont quité l’tchèstia d’Montaigle por one abbîye dé Waulsôrt où ç’qu’is ont fini leûs djoûs.
Dè l’ nèt, l’ombe di Midone rimplîye di lârmes, bèrlande mièrseûle pa-t’t-avau lès rwines do tchèstia, dins s’ blanke rôbe di mariyéye. Elle cache après l’ Gilles, l’ome chèr à s’ cœûr. Elle va insi tote li nèt jusqu’au au momint où ç’ qui l’lune si distind dins l’ blankeû dè l’ piquète do djoû.
On côp tos lès dîj’ans, li djoù dè l’ Tossint, au prumî côp d’ méyenèt, on long èt fwârt criyadje monte dès rwines di Montaigle : “GILLES !” i trawe li nwâreû èt fêt passer dins l’ cœûr dès èfants dispièrtés, on frum’jon di peû.
Par Jean et Hélène dans “Le beau Wallon de notre Terroir” le 5 Novembre 2015