Dj’a conu one vîye cinse, qui choneut bin pièrdûwe,
C’èsteut au d’ dibout dès campagnes, quausu foû vûwe.
Gn-aveut do passadje èt l’ tauve todi mètûwe,
Po l’ facteûr, li cafeu èt l’ gote, li crin.me batûwe.
A onze eûres, li bouyon ou dol sope dâre-tu d’ssus.
Po din.ner, sovint dès cousins qu’avin.n’ riv’nu.
Jamaîs dès grandiveûs èt dès djalous non pus,
Tot l’ monde aveut l’ parole, person.ne ni d’jeut : “Taîje-tu !”
On pwarteut au ciél lès biatés èt lès vèrtus,
On riyeut dès cranchus, dès twardus, dès tièstus,
Mon lès brâves cinsis, portant tortos mau-foutus…
Po l’zî d’ner on côp d’ mwin, on s’aureut yeû batu !
C’èsteut come ça dins l’ timps, tot ça n’ègzistéye pus,
Et c’èst po ça qu’nosse timps èst todi dismètu.
pa André QUEVRAIN.
(Poésie parue dans la revue “Li Chwès” d’octobre 2013.)